АҚШ сценарийнавислар уюшмаси кино тарихидаги энг кулгули АҚШ фильмлари рўйхатини тузди

АҚШ сценарийнавислар уюшмаси АҚШда ишланган 101 та энг кулгули сценарийга эга фильмлар рўйхатини тузди, деб хабар бермоқда The Hollywood Reporter нашри. 

Рўйхатнинг 1-ўринига Вуди Алленнинг 1977 йилдаги “Энни Холл” фильми лойиқ деб топилди.

2-ўринни 1959 йилда суратга олинган Билл Уайлдернинг “Жазда фақат қизлар”, 3-ўринни “Суғур куни” (1993, сценарийнавис Дэнни Рубин ва Харольд Рэймис) эгаллади. 4-ўринга Жеймс Абрахамс ва ака-ука Цукерларнинг “Аэроплан!” (1980) комедияси, 5-ўринга 1982 йилда суратга олинган “Тутси" фильми (Ларри Гелбарт ва Мюррей Шизгэл сценарийси асосида) қўйилди.

Бу рўйхатдан, шунингдек, қуйидаги фильмлар ҳам ўрин олди: “Ёш Франкенштейн” (1974, Мэл Брукс ва Жин Уайлдер) – 6-ўрин, “Доктор Стрейнжлав ёки мен қандай қилиб ҳаяжонланмасликни ўргандим” (1963, Стэнли Кубрик, Питер Жорж ва Терри Саузерн) – 7-ўрин, “Монти Пайтон ва Муқаддас Грааль” – 9-ўрин, “Катта Лебовски” – 13-ўрин, “Гарри Саллини учратганда” – 15-ўрин.

2000 йилда Америка киноинститути кино тарихидаги 100 та энг кулгули АҚШ фильмлари рўйхатини тузганди. Бу рўйхатда 1-ўринни “Жазда фақат қизлар” фильми, 2-ўринни “Тутси” фильми, “Энни Холл” эса 4-ўринни эгаллаган эди.