Эрон президенти Саудия Арабистонининг Теҳрондаги элчихонасига уюштирилган ҳужумни қоралаб чиқди

Эрон президенти Ҳасан Руҳоний эронликлар томонидан Саудия Арабистонининг Теҳрон шаҳридаги элчихонасига уюштирилган ҳужумни қоралади ва бу ҳужум ташкилотчиларини суд орқали жазолашга чақирди.

2 январь куни кечаси, Саудия Арабистонида шиалар хатиби Нимр ан-Нимр қатл қилинганига норозилик сифатида эронликлар саудияликларнинг Теҳрондаги элчихонаси олдида намойиш ўтказиб, бинода ёнғин чиқаришган. Бугун бу ҳужумда иштирок этганларнинг 40 нафарга яқини ҳибсга олингани маълум бўлди.

"Теҳрон ва Машҳадда радикаллар томонидан амалга оширилган ҳаракатлар натижасида Саудия Арабистони элчихонаси ва консуллигига жиддий зарарлар келтирди. Бу ҳаракатларни ҳеч қанақасига оқлаб бўлмайди. Уларнинг бу ҳаракати Эрон Ислом республикасининг халқаро майдондаги обрўсига путур етказиши мумкин", дейди президент.

У мамлакат ички ишлар вазирлигига мурожаат қилиб, вазирлик бу ҳодиса айбдорларини аниқлаш ва судга тортишда миллий хавфсизлик хизмати ва разведка билан ҳамкорлик қилишни сўраган.

Бундан ташқари, у Саудия Арабистонида шиалар хатибини қатл этилишига эътироз билан қараган.

"Мен буни инсонийликка зид қадам деб биламан. Бу орқали инсон ҳуқуқлари яна бир бор қадрсизлантирилди. Мен шайх Нимрнинг оиласи ва яқинларига ҳамда бутун мусулмон оламига ўз таъзиямни изҳор қиламан", дейилган Эрон президентининг баёнотида.

2 январь, шанба куни Саудия Арабистони ИИВ ўлимга маҳкум қилинган 47 кишининг қатли ижро этилгани ҳақида хабар берган эди.

Шайх Нимр ан-Нимр Саудия Арабистони ҳукумати томонидан 2012 йилда мамлакат шарқида ўтказилган норозилик намойиши вақтида қўлга олинган эди. 2014 йилда у мамлакатда тарқоқлик, қиролга бўйсунмаслик ва террорчилик ташкилоти тузганликда айбланиб, ўлим жазосига маҳкум қилинган эди.

2014 йилнинг февраль ойида Саудия Арабистони террорчи ва экстремизмга қарши жиноий жавобгарлик учун жазо чораларини сезиларди даражада кучайтирган эди. Қиролликда террорчи деб тан олинган ташкилотлар рўйхати эълон қилинган.