Chevrolet янги Cruze хэтчбекини намойиш этди

Chevrolet компанияси 11 январда Детройтда очиладиган моторшоуда янги авлод Cruze хэтчбекини тақдим этади. “Седан” кузовли модель эса ўтган йилнинг ёзида тақдим этилган эди, дея ёзмоқда Motor.ru.

Хэтчбек General Motors концернининг “Опел Астра” оиласи учун фойдаланиб келинаётган янги модуль платформаси асосида қурилган. Cruze модели мазкур туркумдаги энг узун ғилдирак базасига эга бўлди (2700 мм). Унинг вазни эса аввалги моделга қараганда 91 килограммга енгилроқ. Юкхонасининг ҳажми эса 524 литрни ташкил этиб, орқа ўриндиқлар йиғиштирилган тақдирда, 1189 литргача кенгайиши мумкин.

Янги модель олти поғонали механик узатмалар қутиси ёки олти диапозонли “автомат” билан жуфтликда ишлайдиган 153 от кучига эга 1.4 турбо двигатель билан таъминланади. Chevrolet Cruze тезлигини соатига юз километргача ошириши учун саккиз сония талаб қилинади.

Хэтчбек шу йилнинг кузида сотувга чиқади ва бир вақтнинг ўзида 40та бозорда сотилади.