Клопп январда «Ливерпуль»га ўзининг собиқ шогирдларидан бирини олиб келмоқчи

«Ливерпуль» жамоасининг бош мураббийи Юрген Клопп айни вақтда «Бавария» жамоаси шарафини ҳимоя қилаётган Марио Гётцени Англияга олиб келмоқчи. Бу ҳақда Германиядаги Bild нашри ёзган.

Қайд этиш керакки, Клопп ва Гётце «Боруссия» жамоасида бирга ҳамкорлик қилганди. Бунгача, футболчининг ўзи асосий таркибга кириши қийин бўлаётганига қарамасдан Мюнхен жамоасида қолмоқчилигини айтмоқда эди.

Bild нашрида ёзилишича, «Бавария» бу футболчини 50 млн евро эвазига қўйиб юборишини билдирган. Футболчининг «Бавария» билан амалдаги шартномаси 2017 йилнинг ёзигача тузилган.

Маълумот учун, Гётце жорий мавсумда бундеслиганинг 7та ўйинида иштирок этди ва битта гол уриб, 3та голли узатмага муаллифлик қилди.