Хитойликлар дунёдаги илк учувчисиз учар таксини ихтиро қилдилар

Лас-Вегасда бўлиб ўтаётган CES 2016 кўргазмасида Хитойнинг учувчисиз парвоз қурилмалари ишлаб чиқарувчи Ehang компанияси дунёдаги илк учувчисиз учар таксини намойиш қилди, деб хабар бермоқда Daily Mail нашри.

Ehang 184 деб номланувчи парвоз қурилмаси катта квадракоптер шаклида бўлиб, бир йўловчини ташиш учун мўлжалланган.

Ehang 184 кабинаси ичида бошқарув асбоб-ускуналаридан ҳеч нарса – на бошқарув дастаги, на штурвали, на тугмалар мавжуд. Кабинада фақатгина ўриндиқ ва планшет маҳкамланган столча бор.

Учар таксида бир жойдан иккинчи жойга учиб ўтиш учун йўлдошли мобиль дастур ёрдамида йўналишни бериш керак. Парвоз пайтида барча бошқарувни дрон ўз зиммасига олади, шунинг учун қурилмани қўллаш учун учувчи лицензияси керак бўлмайди.

Дрон 1,5 метр баландликка ва 200 кг оғирликка эга. Ундаги 8 та электр двигателнинг умумий қуввати 100 кг оғирликдаги юкни ташиш учун етарли булади.

Дрон ҳавога вертикал тарзда кўтарилиб-қўнади. У ҳавода 23 дақиқа давомида ўртача 100 км/соат тезлик билан, 3,5 км баландликкача кўтарилиб ҳаракатлана олиши мумкин.