Велопойга бўйича жаҳон чемпиони 37 ёшида вафот этди

Франциялик велопойгачи Робер Сассон 37 ёшида вафот этди. У саратон хасталигига қарши узоқ вақт давом этган курашдан сўнг кўз юмган. Бу ҳақда 21 январь куни Le Figaro нашрида хабар берилган.

У 2001 йилда ўтказилган жаҳон чемпионатида ғолиб бўлганди. Сассон шунингдек, 2000 йилги Сидней олимпиадасида иштирок этган.

Марҳум спортчи 2000 йилдан 2004 йилгача Cofidis жамоаси таркибида фаолият юритган. 2004 йилда допинг билан боғлиқ шов-шувдан сўнг 2 йилга дисквалификация қилинган эди. Шундан сўнг у профессионал спортчи сифатидаги фаолиятини якунлаганди.

Сассон Cofidis жамоасининг кейинги 13 йил ичида оламдан ўтган тўртинчи вакили бўлди. 2003 йилда пойга вақтида олинган жароҳат туфайли қозоғистонлик спортчи Андрей Кивилев 29 ёшида вафот этган. 2009 йилда эса бельгиялик Франк Ванденбрук 40 ёшида ўпка эмболияси туфайли оламдан ўтган. 2013 йилда эса франциялик собиқ велопойгачи Филипп Гомон 40 ёшида юрак хуружи туфайли дунёни тарк этганди.