Шарапова Australian Open турнири чорак финалида Серена Уильямсга ютқазди

Россиялик теннисчи Мария Шарапова Мельбурн шаҳрида давом этаётган Australian Open турнирининг чорак финалида ўзининг принципиал рақиби, америкалик Серена Уильямсга ютқазди.

Дунёнинг бешинчи рақамли теннисчиси бўлиб турган Россия вакили дунёнинг биринчи ракеткаси ҳисобланадиган Серена Уильямсга 1 соату 35 дақиқа давом этган баҳсда 4:6 ва 1:6 ҳисобларида ютқазгач, ўзаро баҳслардаги кўрсаткич 2:19 кўринишига келди. Шарапова Уильямсни "Катта дубулға" туркумидаги турнирлар доирасида 2004 йилда Лондондаги Уимблдон ва Лос-Анжелесдаги АҚШ очиқ чемпионатларида мағлуб эта олган.

Теннис. Australian Open. Аёллар. 1/4 финал. Мельбурн (Австралия)
Мария Шарапова (Россия, 5) — Серена Уильямс (США, 1) — 4:6, 1:6

Энди ярим финалда Уильямс польшалик Агнешка Радваньска билан учрашади. Польша вакили чорак финалда испаниялик Карла Суарес-Наваррони 6:1, 6:3 ҳисобларида енгган.

Australian Open —«Катта дубулға» туркумига кирувчи дастлабки мусобақа бўлиб, 18-31 январь кунлари Австралиянинг Мельбурн шаҳрида бўлиб ўтади. Турнирнинг умумий соврин жамғармаси 30 миллион долларни ташкил қилади.

Australian Open турнири чорак финалида Мария Шарапова Серена Уильямсга қарши ўйнайди