Норвегияда Tesla компаниясининг Model S элетромобилига эга 126 ҳайдовчи автомобиль етарлича тезлашмаслиги сабабли компания устидан судга даъво аризаси бердилар, деб маълум қилди Bloomberg ахборот агентлиги.
Компания эълон қилган кўрсаткичларга кўра, Model S P85D электромобилида "ақлдан озган режим" кўзда тутилган бўлиб, у ёқилганда седан турган жойидан 100 км/соат тезликкача 3,1-3,3 сонияда тезлашиши керак. Марканинг норвегиялик мижозларининг айтишларича, уларнинг автомобиллари бунчалик тез тезлаша олмайди. Шу сабабли улар пулларининг қайтарилишини талаб қилмоқдалар.
Tesla вакили Сандволд Роланд компания ва мустақил мутахассислар томонидан ўтказилган синовлар автомобилнинг амалдаги кўрсаткичлари эълон қилинганларига мос келишини кўрсатганини айтган.
Таъкидланишича, Норвегия Tesla автомобиллари сотиладиган энг йирик бозорлардан ҳисобланади. Бу давлат томонидан электромобиллар сотиб олишда ёрдам пули берилиши билан боғланган. Model S P85D Норвегияда бошқа сотилмайди, унинг ўрнини P90D модели эгаллаган.
