Ҳиндистонлик ўсмирнинг 20 см лик думи олиб ташланди

Ҳиндистоннинг Нагпур шаҳридан бўлган 18 ёшли ўсмир умуртқасининг қуйи қисмидан ўсиб чиққан 20 см лик думини олиб ташлаш бўйича операцияни бошдан ўтказди.

Ушбу аномалия ўсмир 15 ёшга тўлганда пайқалган.

Ўсмирнинг яқинлари ва унинг ўзи мазах ва ҳақоратланишга қолишдан қўрқиб бу ҳақда ҳеч кимга сўз очмаганлар, бироқ дум ўсишда давом этиб, ўсмирга борган сари халақит бера бошлаган. Боз устига уни яшириш ҳам қийинлашиб борган. Бундан ташқари, дум ичида суяк шакллана бошлаган.

Бундай ҳолат жуда кам учрайди. Ўсмирнинг олиб ташланган думи тиббиёт фанида қайд этилган энг узуни бўлди.

Шифокорларнинг фикрича, дум ҳомиладорлик вақтидаги жароҳат туфайли пайдо бўлган. Бу жароҳат оқибатида боланинг умуртқаси охири яссиланган.

Операция унчалик қийин ўтмаган, бироқ нейрожарроҳ ёрдами керак бўлган, чунки орқа мияга боғлиқлик жойи бўлган.

Номи ошкор этилмаган ўсмир бир неча кундан кейин уйига энди думсиз қайтади.