Корея пойтахти Сеул шаҳри мэри Пак Вон Сун Жанубий Корея президенти Пак Кин Хени истеъфога чиқишга чақирди. Бу ҳақда у журналистлар билан мулоқотида маълум қилган.
"Пак Кин Хе зудлик билан истеъфога чиқиши керак. Президент обрўси ва халқ ишончини йўқотди", - деган 10 млн киши истиқомат қилувчи шаҳар раҳбари. У шунингдек, вазирлар маҳкамаси ва президент маъмуриятида ўтказилган охирги ислоҳотларни ҳам танқид қилган. Унинг сўзларига кўра, бу чоралар сиёсий кескинликни камайтириш ўрнига, жамоатчиликнинг ҳукуматдан норозилигини кучайтиришга хизмат қилади.
Бундан ташқари, Сеул мэри мамлакат сиёсий тизимида ислоҳот ўтказиш зарурлигини қайд этган. "Президентнинг истеъфоси, гарчи Пак Кин Хе инқирознинг асосий сабабчиси бўлса-да, долзарб муаммоларни ҳал этмайди", - деб таъкидлаган Пак Вон Сун. У 2017 йили мамлакатда ўтказиладиган президентлик сайловида давлат раҳбарлиги учун асосий даъвогарлардан бири ҳисобланади.
