Перу пойтахтида ОТИҲ саммити ўз ишини бошлайди

Жанубий Американинг Перу давлати пойтахти Лима шаҳрида ОТИҲ (APEC) саммити ўз ишини бошламоқда. Дунёнинг 21 давлати раҳбари Осиё-Тинч океани иқтисодий ҳамкорлиги доирасида минтақанинг савдо ва иқтисодий тараққиёт масалаларини муҳокама этади. Учрашув якунида қўшма декларация қабул қилинади. 

Перу ТИВнинг ОТИҲ ишлари бўйича вакили Луис Кесаданинг сўзларига кўра, Лима форумида 4 асосий йўналишга оид мавзулар муҳокама этилади. 

Гап ОТИҲ эркин савдо ҳудудини барпо этиш, хизматларнинг рақобатбардошлигини ошириш, транспорт коммуникацияси ҳамда сармояларни жалб этиш ва савдони либераллаштириш соҳасида эришилган аниқ ютуқлар ҳақида бормоқда. 

Йирик анжуман муносабати билан Лима шаҳрида хавфсизлик чоралари кучайтирилди. Перу ИИВ раҳбари Карлос Басомбрионинг маълум қилишича, ОТИҲ саммитида тартибни сақлашга 11,4 минг нафар полициячи жалб этилган. Ҳуқуқ-тартибот идоралари ходимларини ҳар юз-икки юз метрда учратиш мумкин. Уларнинг аксариятида ўқ ўтказмайдиган нимчалар ва ўқотар қуроллар бор. 

Осиё-Тинч океани иқтисодий ҳамкорлиги – минтақанинг 21 давлатини савдо ва иқтисодий соҳада бирлаштирган халқаро форумдир. ОТИҲнинг 2020 йилгача бўлган асосий мақсади Осий-Тинч океани минтақасида эркин ва ошкора савдо тизимини барпо этиш ҳамда либерал инвестиция тартибини йўлга қўйиш сифатида белгиланган. 

ОТИҲга аъзо давлатлар жаҳон ЯИМнинг 57 фоизини ишлаб чиқаради. Халқаро савдо айланмасининг 48 фоизи, бевосита хорижий сармояларнинг 40 фоизидан ортиғи ҳамда жаҳон аҳолисининг 40 фоиздан ортиғи ушбу ташкилотга аъзо давлатлар ҳиссасига тўғри келади.