Ливиядаги Afriqiyah Airways авиакомпаниясининг йўловчи самолёти олиб қочилди. Бортида 118 киши бўлган ушбу самолёт Мальтага қўндирилган. Бу ҳақда Мальтадаги нашрларга асосланиб, Рейтерс агентлиги хабар берди.
Нашрлар маълумотларига кўра, йўловчилардан 2 нафари самолётни портлатиб юбориш билан таҳдид қилган. Уларнинг талаблари ҳозирча маълум эмас.
The Times of Malta нашрида аниқлик киритилишича, Airbus A320 Сабҳа шаҳридан мамлакат пойтахти Триполига рейсни амалга ошираётган самолёти 2 нафар номаълум шахс томонидан олиб қочилиб, Мальтага қўндирилган.
Мальта бош вазири бу ҳақда хабардор эканини маълум қилди. Унинг сўзларига кўра, мазкур ахборот ҳуқуқни муҳофаза қилиш органлари томонидан ўрганилмоқда.
