АҚШда 19 февралга ўтар кечаси бўлиб ўтиши режалаштирилган Bellator 172 мусобақасининг россиялик Фёдор Емельяненко ва америкалик Мэтт Митрион ўртасидаги бош жанги америкаликнинг бетоблиги сабабли бўлиб ўтмайдиган бўлди. Бу ҳақда Bellator раҳбари Скотт Кокер твиттерда маълум қилди.
Америкалик буйрагида тошлар бўлиши мумкинлигига гумон билан шифохонага тушиб қолди ва шу сабабли жанг бекор қилинди.
Мусобақанинг бош жанги Патрик Фрейре ва Жош Томсон ўртасидаги жанг билан алмаштирилди.
Кейинроқ маълум қилинишича, қолдирилган жанг бир неча ой кейинга суриладиган бўлган.
“Бир неча дақиқа аввал Bellator жангни расман бекор қилди, рақибим касалхонага тушиб қолди. Жуда катта иш қилинганди, мен бу жангга жиддий тайёргарчилик кўргандим, бироқ афсуски, жанг бугун ўтмайди. Мэттга тезда соғайиб кетишини тилайман. Бизнинг жанг Митрион тикланиб олиши учун бир неча ой кейинга сурилади”, деб ёзган россиялик спортчи.
“Бу жангга тайёргарчилик кўришимда ёрдам берган, менга мухлислик қилган барчага миннатдорчилик билдираман. Барчаси учун Тангрига беадад шукр”, деб қўшимча қилган Фёдор.
Фёдорнинг бу жанги унинг катта спортга қайтишидан кейинги 3-жанги бўлиши керак эди.
