Покистон бош вазири Навоз Шариф Афғонистон билан чегарадаги назорат-ўтказиш пункти фаолиятини қайта тиклаш ва чегарани зудлик билан очиш ҳақида буйруқ берди. Бу ҳақда бош вазир офисидаги манбага асосланиб хабар тарқатилган.
Покистон 17 февраль куни Афғонистон билан чегарани ёпганди. Бунга мамлакатда ой давомида содир этилган терактлар сабаб бўлганди. Хусусан, Синд провинциясининг Сехван шаҳридаги сўфийлар масжидида теракт содир этилиб, 74 кишининг ўлимига ва 300 кишининг жароҳатланганди. Ҳукумат махсус кучлари 1 ой давомида аксилтеррор кампания ўтказди.
Покистон ҳукумати ушбу терактлар Афғонистон ҳудудидаги жангарилар томонидан тайёрланганини маълум қилганди. Чегараларни ёпиш орқали Афғонистон ҳудудидан келадиган хавфни бартараф этишга умид қилинганди.
Покистон 7 март куни Афғонистон билан чегараларидаги иккита асосий ўтказув пунктларининг (Торхам ва Чаман) фаолиятини қисман тиклаганди. Чегара пунктларидан фақатгина пиёда саёҳат қилаётганларга рухсат берилган, автомобилда ўтиш мумкин эмасди.
