Смартфонлар бозорида қайси компания етакчиликни қўлга олгани маълум бўлди

TrendForce ҳисоботига кўра, 2017 йилнинг биринчи чораги якунлари бўйича Samsung компанияси смартфонлар бозорида 26,1 фоизни ўз қўлига олди, Apple эса – атиги 16,9 фоиз. Бу ҳақда Life хабар берди.

Таъкидланишича, Samsung мобил бўлинмаси сўнгги бир неча ой ичида жиддий муваффақиятларга эришди: 2016 йилнинг тўртинчи чорагида Корея технология гиганти 18,5 фоизлик кўрсаткич билан иккинчи ўринни эгаллаган бўлса, Apple’да – 20,3 фоиз бўлган.

Sammobile.com фикрича, компания Galaxy Note 7 билан боғлиқ нохуш ҳолатлардан сўнг бир қадар арзонроқ бўлган Galaxy J ва Galaxy A смартфонларининг яхши сотилиши туфайли ўз позициясини тиклаб олган.

Samsung Galaxy S8 чиққанидан сўнг, 2017 йилнинг иккинчи ва учинчи чоракларида ҳам етакчиликни сақлаб қолиши мумкин.