"Форсаж 8" ижарасининг илк кунлари фильм харажатини 4 карра қилиб қайтарди

Фото:EPA

Ҳолливуднинг "Форсаж 8" (The Fate of the Furious, 2017) фильмининг ўтган ҳафта дам олиш кунларидаги илк ижараси, дастлабки маълумотларга кўра, 532,5 млн долларга яқин маблағ тўплаган. Мазкур рақам шу борадаги энг юқори натижа бўлди. Бу ҳақда ушбу фильмнинг муаллифлик ҳуқуқига эгалик қилувчи Американинг Universal Pictures компанияси маълум қилди.

Шу билан режиссёр Феликс Гэри Грей ижодига мансуб оммабоп фильмларнинг навбатдаги серияси "Юлдузли жанглар: Кучнинг уйғониши" (Star Wars: The Force Awakens, 2015) картинаси ўрнатган рекорддан ўзиб кетди. Фазовий курашлар фильми илк ижара кунларида 529 млн доллар тўплашга муваффақ бўлганди.

"Форсаж 8" фильми Шимолий Америкадан бошқа мамлакатлардаги ижара рейтингларида ҳам биринчи ўринни эгаллаган. Бу картина хорижий мамлакатларида 432,3 млн доллар тўплаган. Шу билан 316 млн доллар тўплаган аввалги етакчи "Юра даври дунёси" (Jurassic World, 2015) натижасини сезиларли ортда қолдирди.

Шу билан бирга, Universal Pictures кинокомпанияси, гап дастлабки натижалар ҳақида бораётганини эслатар экан, рақамларга аниқлик киритилиши мумкинлигини таъкидлаган.

Вин Дизел ва Дуэйн Жонсонлар қаҳрамонлигидаги "Форсаж 8" фильми 14 апрель куни ижарага чиққан эди. Фильм бюджети 250 млн долларни ташкил этди.

#бюджет #Форсаж 8