Нидерландия қироли ўзи билан боғлиқ катта сирни очди

Нидерландия қироли Виллем-Александр ўзи билан боғлиқ катта сирни ошкор қилди: у ҳанузгача яширин тарзда KLM Cityhopper авиакомпанияси рейсларида иккинчи учувчи бўлиб ишлар экан. У бир ойда икки марта мунтазам равишда парвозларда иштирок этади. 

Қиролнинг айтишича, у ўзининг аслида кимлигини ошкор қилмаган ҳолда йўловчиларни экипаж номидан қутлашни хуш кўради. Бироқ, баъзида уни овозидан таниб қолишади.

ВВС телекомпаниясининг таъкидлашича, қиролда учувчилик гувоҳномаси борлиги аввал ҳам маълум бўлган: у бу рухсатномани сақлаб қолиш учун вақти-вақти билан кичик ўлчамдаги Fokker 70 самолёти штурвали ортига "таклиф қилинган меҳмон учувчи" сифатида ўтирган. Бироқ унинг йўловчи рейсларда учувчи бўлиб ишлашини ҳанузгача ҳеч ким билмаган. 

Виллем-Александр яна бир сирни ошкор қилди: у ёзда малака ошириш курсларидан ўтиб, узоқда жойлашган шаҳарларга кўп сонли йўловчиларни ташиш учун Boeing 737 лайнерини бошқаришни ўрганиб олмоқчи.