Макрон ва Путин қачон учрашиши маълум

Фото: Утро

Елисей саройининг хабар беришича, Франция президенти Эммануэль Макрон Россия раҳбари Владимир Путин билан Версалда 29 май куни музокаралар ўтказади. Бу ҳақда Елисей саройи тарқатган баёнотда айтилади.

Куни кеча "Коммерсант" газетаси ўз манбаларига асосан Путиннинг Францияга ташрифи 29 май куни амалга ошиши ҳақида хабар берганди. Нашр маълумотларига кўра, ташрифга сабаб – француз қиролларининг Версалдаги қароргоҳида Пётр I’га бағишланган кўргазмаларнинг очилишидир.

"Бу кўргазма Санкт-Петербургдаги Эрмитаж музейи билан ҳамкорликда ташкил этилди ҳамда шу орқали Франция ва Россия ўртасидаги дипломатик муносабатларнинг 300 йиллиги нишонланади", - дея таъкидлаб ўтишди Франция раҳбари маъмуриятида.