Наманганда анъанавий “Гул байрами” бошланди. 27 май - 1 июнь кунлари ўтадиган бу йилги тантаналарга вилоятда қизғин хозирлик кўрилган. Хусусан, Наманган шаҳар ҳокимлиги берган маълумотга кўра, асосий байрам тадбирлари ўтказиладиган “Заҳириддин Муҳаммад Бобур" номли маданият ва истироҳат боғининг ўзига 1 миллиондан зиёд гул кўчатлари ўтқазилган.
5 кун давом этадиган байрам давомида турли кўнгилочар дастурлар, ташкилот, корхона ва муассасалар гулчи боғбонларининг кўргазмалари, дизайнерларнинг гуллардан ясаган композициялари, сценарийлаштирилган адабий тадбирлар ва ҳунармандларнинг бетакрор санъат асарлари намойиши аҳолига байрам кайфиятини улашади.
Байрам тадбирлари жараёнида кўрик танловлар ғолиблари аниқланади ва “Энг ораста маҳалла”, “Энг ораста кўча”, “Энг ораста ташкилот”, “Энг ораста уй-жой мулкдорлар ширкати”, “Энг ораста хонадон”, “Энг ораста раҳбар кўчаси” номинациялари бўйича ғолиблар тақдирланади.
Темурмалик Воҳидов
