Туркиянинг «Бешиктош» клуби нидерландиялик ҳужумчиси Райан Бабель Тошкентнинг «Пахтакор» клубига ўтиши мумкин. Бу ҳақда Tribuna.Uz нашрига вазиятдан хабардор манбалар маълум қилган.
Тошкентликлар жамоасининг янги бош мураббийи Шота Арвеладзе 2012-2015 йилларда Туркия чемпионатида ишлаган, у «Қосимпошо»да Бабелга мураббий бўлган.
Айни вақтда 31 ёшда бўлган Райан Бабель 2003-2007 йилларда «Аякс», 2007-2011 йилларда «Ливерпуль», 2011-2012 йилларда «Ҳоффенҳайм» клублари сафида тўп сурган, 2012 йилда яна «Аякс»га қайтган, бир мавсумдан сўнг Туркияга, «Қосимпошо»га йўл олиб, 2015 йилгача шу жамоа сафида тўп сурган, 2015-2016 йилги мавсумни БААнинг «Ал-Айн» клубида ўтказган, 2016 йилда «Депортиво» аъзоси бўлган, шу йил январида эса «Бешиктош»га келган. У бу жамоа сафида 17 ўйинда майдонга тушиб, 5та голга муаллифлик қилди.
Бабель Нидерландия терма жамоаси сафида 43 ўйин ўтказиб, 5 гол урган. У миллий терма жамоага 2011 йилдан буён чақирилмаган.
Маълумот учун, transfermartkt.de ушбу футболчининг трансфер қийматини 4,25 млн евро этиб баҳолаган.
Бундан аввалроқ «Пахтакор» Шота Арвеладзе ортидан унинг жамоаларида тўп сурган черногориялик футболчи Марко Симични ўз сафига қўшиб олганди.
