АҚШ Филиппинга аксилтеррорчилик амалиётлари учун қурол-яроғ етказиб берди

АҚШ Филиппинга терроризм билан курашда ёрдам тариқасида қурол-яроғ етказиб берди. Бу ҳақда АҚШнинг Маниладаги элчихонаси хабар қилган.

"Ўқ-дори ва қурол-яроғларнинг етказиб берилиши орқали Филиппин қуролли кучларининг аксилтеррорчилик имкониятлари ошади ҳамда шу орқали, Филиппин жануби, жумладан, Маравида терроризм билан кураш бўйича амалиётларда иштирок этаётган ҳарбийлар тўғридан тўғри қўллаб-қувватланади", - дейилади элчихонанинг баёнотида.

Баёнотга кўра, АҚШ Филиппин армиясига 992 та ракета, 1040 та ракета двигателлари етказиб берди ҳамда қўшимча 250 та ракета гранатомёти ва мингта гранатомётни етказиб беришни режалаштирмоқда.

Қурол-яроғ билан таъминлаш Америка-Филиппин ўзаро моддий ва техник кўмак тўғрисидаги Келишувига асосан амалга оширилмоқда, дея таъкидлаб ўтишган элчихонадан.

Аввалроқ Филиппин президенти “расво” Америкага ҳеч қачон бормаслигини айтганди.