Неймар «ПСЖ» учун тиббий кўрикдан ўтган

Неймар «ПСЖ»да тиббий кўрикдан ўтишга улгурган.

L’Equipe нашри хабарига кўра, тиббий кўрик Португалияда, «Пари Сен-Жермен» клуби шифокори назорати остида ўтказилган. Ушбу футболчи трансфери ҳақида эртага — 4 август куни эълон қилиниши кутилмоқда.

Бразилиялик футболчи янги клуби билан 5 йиллик шартнома тузади, у ҳафтасига 575 минг евро (солиқлар чиқариб ташланганда)  миқдорида маош олади. 

Бундан аввалги хабарларда «ПСЖ» молиявий фэйр-плей қоидаларини бузмаслик учун 222 миллион евро бадал пулини Қатар жамғармаси орқали тўлаши мумкинлиги ҳақида айтилганди. Шунингдек, Неймар Қатарда ўтадиган ЖЧ-2022 элчисига айланиши эвазига оладиган даромад эвазига «Барселона»га бадал пулини тўлаш варианти ҳам мавжуд.