Автомашиналардан қимматбаҳо буюмларни ўғирлаган шахс қўлга олинди 

Андижон вилояти ИИБ автуловдан пул ва бошқа қимматбаҳо буюмларни олиб қочган ўғрини ушлашга муваффақ бўлди. Вилоят ИИБ матбуот хизматининг Кун.uz’га маълум қилишича, жорий йил 1 август куни номаълум шахс Андижон туман Ойжамол маҳалла фуқаролари йиғини ҳудудида Андижон шаҳарида яшовчи Ш.М.га тегишли бўлган «Spark» автомашинасининг олд эшигини темир жисм билан очган. Сўнгра, автомашина салонида бўлган 3 дона уяли телефон аппарати, 100 АҚШ доллари ва 1 млн 900 минг сўм пулларни ўғирлаб кетган. 

Туман ИИБ Тергов бўлими томонидан кўрилган чоралар натижасида номаълум шахс аниқланиб ушланди. У шу МФЙ Навбаҳор кўчасида яшовчи Э.Б.бўлиб чиқди. Ашёвий далил сифатида 100 АҚШ доллари, 1 дона телефон аппарати ва 450 минг сўм пул олинди. 

2017 йил 4 августида ушбу ҳолат юзасидан Ўзбекистон Республикаси Жиноят кодексининг 169-моддасини 2-кисми билан жиноий иш қўзғатилди. 

Ҳозирда ушбу фуқаронинг бошқа жиноятларга алоқадорлиги текширилмоқда.