КХДРдан келган меҳнат мигрантлари оммавий равишда Хитойни тарк этишмоқда

Фото: Ёнҳап

12 сентябрь куни Хитой Халқ Республикаси ҳукумати Шимолий Корея фуқароларининг визасини ортиқча чўзмаслик ҳақида фармойиш берди.

Хитойда меҳнат қилаётган шимолий кореялик ишчилар БМТ Хавфсизлик кенгаши санкциялари туфайли визани узайтириш қоидалари қатъийлаштирилиши сабабли оммавий равишда ўз ватанларига қайтишмоқда. Бу ҳақда Жанубий Кореянинг Ёнҳап ахборот агентлиги маълум қилмоқда.

Хитойликларнинг меҳнат мигрантларига нисбатан сиёсати қатъийлашишига БМТнинг КХДРга нисбатан жорий этган санкциялар сабаб бўлган.

— 2017 йилнинг биринчи ярмида КХДР билан чегара яқинидаги Дандун шаҳрида Шимолий Кореянинг камида 20 минг фуқароси меҳнат қилган. Айни пайтда Хитой санкцияларни қатъийлаштиргач, уларнинг сони сезиларли тарзда қисқарган, — дейилади хабарда.

11 сентябрь куни БМТ хавфсизлик кенгаши КХДРга нисбатан санкцияларни қатъийлаштириш ҳақида резолюция қабул қилди. Хусусан, Шимолий Кореяга нефть ва нефть маҳсулотлари етказиб беришга нисбатан чекловлар жорий этилган. Бундан ташқари, Пёнгянгга текстил маҳсулотларини сотиш, конденсат ва газконденсатли суюқликлар харид қилиш тақиқланади.