Тимошенко Украина президенти бўлмоқчи

Фото: Петр Кассин / Коммерсантъ

«Батькившина» фракцияси раҳбари Юлия Тимошенко Украинада бўлиб ўтадиган президентлик сайловида иштирок этмоқчи. У бу ҳақда Украинанинг NewsOne телеканали эфирида маълум қилди. Унинг фикрича, «ҳақиқий демократик партиялар бир-бири билан ҳамкорлик қилиши керак».

«Мен энди ўз овозим, жамоамнинг овози, менга ишонадиган одамларнинг овозини бошқа ҳеч кимга ишониб топширмайман. Мен аниқ айтишим мумкин: президентликка номзод бўламан. Биз мамлакатни оёққа турғазиш учун ғалаба қозонамиз. Мен энди бу ишни ҳеч кимга ишонмайман», - деди Тимошенко хоним. Унинг сўзларига кўра, Украина собиқ президенти ва бош вазири Виктор Юшченко ҳамда Арсений Яценюкнинг қўллаб-қувватланиши «ҳеч нарсага олиб келмаган».

Эслатиб ўтамиз, Украинада президентлик сайловлари 2019 йилнинг 31 март куни бўлиб ўтиши керак.