Қирғизистон Республикаси Жалолобод шаҳар депутатлари Кенгаши ва ниҳоят шаҳар мэри ким бўлишини аниқлаб олишди. Пайшанба куни ўтказилган сессияда янграган эълонга кўра, Салайдин Авазов шаҳар мэриясини бошқаради.
24.kg нашрининг ёзишича, «Ийгилик» коалицияси номидан номзоди илгари сурилган Авазов рақобатчиси Майрамбек Адилбековдан устун келган. Мазкур сессияда 31 нафар депутат иштирок этди.
Йиғилиш сўнгига қадар, Майрамбек Адилбеков ўз хоҳишига кўра, номзодини қайтариб олишга қарор қилган. Шундай қилиб, Салайдин Авазовни қўллаб 30 нафар депутат овоз берди, дейилади хабар матнида.
Эслатиб ўтамиз, 2016 йил декабрь охирида шаҳар мэрини сайлаш жараёни муваффақиятсиз якунланганди. Шундан сўнг, учта йирик сиёсий партия коалиция ташкил қилиб, мандат асосида иш кўриб келган.
