Вьетнамлик йигит сунъий нафас бериш орқали чўкаётган кучукчани қутқарди

Вьетнамлик велосипедчи пластик бутилка ёрдамида нафас йўлларига сунъий вентиляция йўллаш орқали чўкаётган кучук боласини қутқарди. У жараённи бошидаги дубулғасига бириктирилган камерага муҳрлади.

Йигит дастлаб ҳушини йўқотган жониворни артиб, тилини ютиб юборганми ёки йўқ - текширди, кейин туби олинган пластик бутилкани олиб, кучукчага сунъий нафас бера бошлади. Шундан сўнг кучукчада ҳаётга қайтиш белгилари сезилди.

Велосипедчи уни иситиш учун матога ўради. Вьетнам оммавий ахборот воситаларига берган интервьюсида у сунъий нафасни тўғри бериш қандай бўлишини билмаслигини, шунчаки интуитив ҳаракат қилганини айтди.

Кучукчанинг кейинги тақдири ҳақида маълум қилинмаган.