Қозоғистонда 400 дан кўпроқ кончи ер остида қолмоқда 

Қозоғистонда ArcelorMittal компаниясининг 400 дан кўпроқ кончиси ер остида қолмоқда. Улар компания раҳбариятидан маошлари оширилиши ва меҳнат шароитларининг яхшиланишини талаб қилишмоқда.

11 декабрда ArcelorMittal’нинг 4 та конида 200 га яқин кончи смена якунлангандан кейин иш жойларини тарк этишдан бош тортганлар. Шундан кейин компаниянинг маҳаллий бўлинмаси раҳбарияти ва кончилар касаба уюшмалари ўртасида мулоқот бошланган. 12 декабрда Қозоғистон меҳнат вазири Тамара Дуйсенова ташқарига 680 дан кўпроқ кончи чиқишни истамаётганини маълум қилган. Ушбу иш ташлаш Қозоғистон бош вазири Бакитжан Сағинтаевнинг ArcelorMittal’нинг асосий акциядори Лакшми Миттал билан мулоқот қилишига сабаб бўлган. 13 декабрда губернатор билан суҳбатдан кейин 150 дан кўпроқ кончи юқорига кўтарилган.

“14 декабрда раҳбарият билан суҳбатдан кейин 100 га яқин киши ер остидан кўтарилди. 4 та шахтада 400 дан кўпроқ одам қолди. Бошқа конларда ер остида одамлар йўқ”, дейилган компания хабарида.

Маълум қилинишича, 14 декабрда “Тентекская” конига “АрселорМиттал Темиртау” АЖ бош директори Парамжит Калон ва ҳукуматнинг бир неча вакиллари келган.

“Мен бугун конга 4 марта тушиб, кончиларга ер остида ўтириш ечим эмаслигини, зудлик билан юқорига чиқиб, музокаралар бошлаш кераклигини тушунтирдим. Кончилар кўниб, юқорига чиқмоқдалар. Шахсан ўзим бугун 37 кишини юқорига олиб чиқдим”, деб айтган "АрселорМиттал Темиртау"нинг кўмир ишлаб чиқариш департаменти директори Танат Дауов. 

"АрселорМиттал Темиртау" АЖ ArcelorMittal компанияси таркибига киради ва Қозоғистондаги энг йирик тоғ-металлургия корхонаси ҳисобланади. ArcelorMittal дунёда пўлат ишлаб чиқарувчи энг йирик компаниялардан ҳисобланиб, 60 та давлатда ваколатхоналари ва ишлаб чиқариш қувватларига эга.