Хўжанд аэропортида йўловчиларнинг юкини ташлаб келган самолёт ҳолатга изоҳ берди 

14 декабрь куни Истанбул-Душанбе йўналиши бўйича Тожикистон бош аэропортига қўнган самолёт йўловчиларининг 150 нафари ҳанузгача юкларини қабул қилмади.

Маҳаллий тожик нашрларининг хабар беришича, расмий вакиллар​ Turkish Airlines авиакомпаниясига тегишли самолёт парвозида кузатилган техник камчиликлар учун барчадан узр сўраган. Шунингдек, йўловчиларнинг юклари тез орада етказилишини билдирган.

«Душанбе шаҳридаги аэропортга қўниш учун ноқулай об-ҳаво шароити ҳақида олдиндан хабар берилганди. Хавфсизлик йўриқномасида кўрсатилганидек, кема командири қўшимча иккита аэропортни фавқулодда қўниш учун танлаши лозим. Бу ҳолатда энг яхши танлов Хўжанд ва Самарқанд аэропортлари ҳисобланади», дейилади компания расмий тушунтириш хатида.

Маълум қилинишича, Хўжанд шаҳрида ҳам кузатилган ноқулай об-ҳаво шароити самолётни аэропортга қўндиришда хавф даражасини ошириб юбориши мумкин эди. Самарқандда тўхташ учун қўшимча 1,5 тонна авиа ёқилғи талаб қилинади. Шунинг учун, кема бошқарувчиси йўловчиларнинг 1,5 тонна оғирликдаги юклари эвазига 1,5 тонна ёқилғини ғамлаб олишни маъқул топган.

Шунга қарамай, Истанбулдан кўтарилган самолёт йўловчиларига бу ҳақда маълумот берилмаган, қолаверса, Душанбе шаҳрига белгиланган муддатдан 45 дақиқага кечикиб қўнган ҳаво лайнери борт аъзолари ҳам маълумот бермаган.