Жорий йилнинг октябрида ишлаб чиқарилган Huawei Mate 10 Pro флагман смартфони фойдаланувчиларда ҳар тарафлама қизиқиш уйғотди - дизайнидан тортиб то ажойиб камерасигача. Шундай бўлса-да, бу ишлаб чиқарувчи одатда йилига учта флагман тақдим этади.
Бўлғуси янги қурилма кўплаб хусусиятлар билан "сийланган", бироқ асосийлари - уч асосий камера, ҳошиясиз IPS-экран ҳамда юзни сканерловчи iPhone X муқобили. Huawei P11 ташқи кўринишни сканерловчи модулга эга бўлса-да, ишлаб чиқарувчи телефоннинг орқа томонидан бармоқ излари сканерини ҳам жойлайди. Шундай экан, фойдаланувчилар қайси сканер модулидан фойдаланишни танлаш имконига эга бўлишади.
Бугун Science and Knowledge дизайнерлари биринчи марта ҳашаматли Huawei P11 смартфонини суратларда намойиш қилишди. Дастлабки маълумотларга кўра, Хитой корпорациясининг янги флагмани ҳошиясиз 6-дюймли IPS-экран, саккиз ядроли HiSilicon Kirin 970 топ-процессори, 6 Гб оператив ва 128 Гб флеш-хотира, уч асосий 40 Мп ва 24 Мп фронтал камера, шиша корпус ва иккинчи авлод USB Type-C'га эга бўлади.
Қатор манбалар маълумотларига кўра, Huawei P11 уч асосий камераси ҳисобига ажойиб эффектли суратлар олади, шунингдек 4-карра оптик зумларни қўллаш имконини беради. Маълумот ўрнида айтиш жоизки, бугунги кунда iPhone X, Samsung Galaxy Note 8 ва бошқа топ мобил қурилмалар фақат 2 карра яқинлаштирувни таъминлай олади.
Huawei компаниясининг янги смартфони тақдимоти келгуси йилнинг февралида MWC 2018 кўргазмаси доирасида бўлиб ўтиши кутилмоқда.
