АҚШда ўқитувчи мактабда отишма содир этди

Фото: The Courier-Journal, Arza Barnett

АҚШнинг Жоржия штатидаги мактабда ўқитувчи отишма содир этди. Бунинг оқибатида ҳеч ким жабрланмаган, ўқитувчи эса қўлга олинган. Мактаб фаолияти вақтинчалик тўхтатилган. Бу ҳақда твиттерда маҳаллий полиция маълум қилди.

Дэлтон шаҳрининг твиттердаги аккаунтида Тошкент вақти билан соат 22:30да бир кимса маҳаллий мактабнинг синфхоналаридан бирида қамалиб олгани ва бу ўқитувчи эканлиги ҳақида хабар пайдо бўлган.

Кейинроқ полиция ота-оналарни мактаб биносига кирмасликка чақирган ва 10 дақиқа ўтмасдан, гумонланувчи қўлга олинганини маълум қилган.

АҚШда Флоридадаги мактабда юз берган оммавий қотилликдан кейин бундай воқеалар синчков кузатилмоқда.

АҚШ президенти Дональд Трамп баъзи ўқитувчиларни хавф пайдо бўлган вақтда ўз ўқувчиларини ҳимоялай олишлари учун қуроллантириш вариантини муҳокама қилмоқда. Бироқ бу таклиф кўплаб танқидларга учради, чунки одамлар кўнгилсиз воқеалар янада кўпроқ юз беришидан хавотирланмоқдалар.

Тайёрлаган: Шуҳрат Раҳимов

#АҚШ #мактаб #отишма #ўқитувчи #Жоржия