Қатл этилган ирландиялик 140 йилдан кейин оқланди

Ирландияда 140 йил аввал қатл этилган Майлз Жойс исмли эркак оқланди. Бу ҳақда Irish Times нашри хабар бермоқда. 

Маълум қилинишича, Жойс Ирландия Республикаси ташкил этилишидан аввал содир этилган жиноят учун дорга осиш орқали қатл этилган. Уни Ирландиянинг амалдаги президенти Майкл Хиггинс афв этди. Хиггинс ушбу воқеа “Ирландия ва Британия тарихидаги шармандали ҳолат” эканини таъкидлаб ўтган. Унинг қарори деярли 1,5 аср аввал содир этилган хатони тўғрилашга қаратилган.

Таъкидланишича, жабрдийда 5 кишининг ўлдирилишида айбланган. Жойс 1882 йилда у билан бирга судланган икки эркак унинг айбсизлигини таъкидлашига қарамасдан, қатл этилган. Суд жараёни инглиз тилида олиб борилган, Жойс эса уни билмаган. Қотиллик қурбонлари 6 кишидан иборат оила аъзолари бўлишган. Улар ўз уйларида ҳалок бўлганлар. Маълум қилинишича, Жойс қурбонлардан баъзилари билан таниш бўлган, бироқ унинг қотилликка алоқадорлигига шубҳа бўлган.

Ирландия ҳукумати Жойснинг айбсизлиги ҳақида илк бор 2015 йилда унга қўйилган айблов ёлғонлиги аниқлангандан кейин маълум қилган.