Чиқариб юборилган россиялик дипломатлар орасидаги разведкачилар сони айтилди

Ғарб давлатларидан чиқариб юборилган россиялик 152 дипломат орасида Ташқи разведка хизматининг уч нафар амалдаги ходими бўлган. Бу ҳақда Россия Ташқи разведка хизмати матбуот хизматидан хабар беришди, деб ёзмоқда РИА «Новости».

«Буюк Британиянинг провокацион хатти-ҳаракатлари туфайли Россиянинг хориждаги муассасаларида иш жойини тарк этишга мажбур бўлган россиялик 152 дипломатик ходим орасида хизматнинг уч нафар амалдаги вакили бўлган. Россия Ташқи разведка хизмати директори С.Наришкин улар билан бугун мулоқот ўтказди», - дейилади хабарда.

Эслатиб ўтамиз, аввалроқ Россиянинг Лондондаги элчихонаси Британия Ташқи ишлар вазирлигига ташқи сиёсат идораси раҳбари Борис Жонсон билан ГРУ собиқ полковниги Сергей Скрипалнинг заҳарланиши бўйича вазиятни муҳокама қилиш учун учрашиш илтимоси билдирилган нота юборганди.