Дунё совуқ уруш даврига қайтди – БМТ бош котиби

Дунё совуқ уруш даврига қайтди, кўплаб давлатларнинг геосиёсий манфаатлари тўқнаш келган Яқин Шарқдаги хаос эса глобал тинчлик ва хавфсизликка хавф солади. Бу ҳақда БМТ бош котиби Антониу Гутерриш 13 апрелда БМТ Хавфсизлик кенгашидаги нутқида айтиб ўтди.
  
“Сурияда бир нечта давлатлар армияси иштирокидаги урушни ва кўп сонли қуролланган гуруҳлар, террорчилик ташкилотлари, ҳукумат кучлари ва у ерга бутун дунёдан келаётган хорижий жангарилар ўртасидаги қарама-қаршиликни кузатмоқдамиз”, деб айтган Гутерриш.

У тинч аҳоли даҳшатли азоб-уқубатларга учраётганини эслатиб ўтган ва Сурияда кимёвий қурол қўлланиши ҳақида хабарлар келишда давом этаётганидан аччиқланган.

Гутерришнинг айтишича, Кимёвий қуролни тақиқлаш ташкилоти мутахассисларининг биринчи гуруҳи Сурияга етиб келган, иккинчиси эса 1-2 кунларда етиб келади. БМТ бош котиби ушбу миссиянинг кимёвий қурол қўлланган-қўлланмаганини ўрнатишда самарали ишлаши учун зарур шароитларни таъминлашни талаб қилган. Гутерришнинг таъкидлашича, Сурия ҳукумати ҳам тергов ўтказилишини талаб қилган ва мутахассислар ишини қўллаб-қувватлашга ваъда берган.