Кобулдаги терактда 9 нафар ОАВ ходими ҳалок бўлгани маълум қилинди

Афғонистон пойтахти Кобулда 30 апрель эрталаб содир этилган 2 та портлашда ҳалок бўлган 29  кишидан 9 нафари ОАВ ходимлари бўлган. Бу ҳақда TOLOnews телеканали хабар берди.  

Аввалроқ ҳужум оқибатида фотомухбир Ша Марай ҳалок бўлгани маълум қилинганди. У Agence France-Presse ахборот агентлигининг Кобулдаги фотобюросига бошчилик қилган. Кейинроқ маълум қилинишича, теракт  оқибатида, шунингдек,  TOLOnews оператори, 1TV телеканалининг журналисти ва оператори, Mashal TV телеканалининг 2 ходими ва Azadi Radio’нинг 3 журналисти ҳалок бўлган.

Ҳужум хорижий давлатлар ваколатхоналари ва Афғонистон разведка хизмати жойлашган туманда юз берган. Биринчи портлаш маҳаллий вақт билан соат 08:00 атрофида мотоциклдаги террорчи-худкуш томонидан амалга оширилган. Иккинчи портлаш шу ҳудудда 20 дақиқадан кейин, воқеа жойига фавқулодда хизматлар ва журналистлар келганда содир этилган. Ҳужум оқибатида 29 киши ҳалок бўлган, 49 киши яраланган.

Теракт учун жавобгарликни ИШИД террорчилик гуруҳи ўз зиммасига олган.