“Реал” Чемпионлар лигаси финалига қаторасига 3 марта чиққан 3-клуб бўлди  

Мадриднинг “Реал” ва Мюнхеннинг “Бавария” клублари Чемпионлар лигаси яримфиналининг жавоб учрашувида дуранг натижа қайд қилди. Мадриддаги “Сантьяго Бернабеу” стадионида ўтган учрашув 2:2 ҳисоби билан якунланди.

Мюнхенда ўтган учрашув мадридликларнинг фойдасига ҳал бўлганди (1:2). Шу тариқа икки учрашув натижасига кўра, мадридликлар мусобақанинг финалига қаторасига 3-марта чиқишди. Бундан аввалги 2 мавсумда ҳам “Реал” мусобақанинг финалига чиқиб, унда ғолиб бўла олганди. 

Аввал бундай натижага фақатгина иккита италян клуби – “Ювентус” ва “Милан” эриша олган. Туринликлар мусобақанинг 1996, 1997 ва 1998 йиллардаги, миланликлар эса 1993, 1994 ва 1995 йиллардаги финалларида иштирок этишга муваффақ бўлишган. Қайд этиш жоизки, “Юве” ва “Милан” бу финаллардан фақат биридагина ғолиб бўлган (мос равишда 1996 ва 1994 йилларда).