12 май куни соат 14:52да Тошкентнинг Яшнобод туманида салонида 20 нафар йўловчиси бўлган 119-сонли Isuzu автобуси иштирокида йўл транспорт ҳодисаси содир бўлди.
Gazeta.uz’нинг маълум қилишича, Оҳангарон кўчаси бўйлаб Қўйлиқ 1-мавзеси томонга ҳаракатланиб кетаётган автобус (давлат рақами 01 023 EDA) олдидан фил суяги рангидаги Nexia автомобили кескин ўнгга бурилиши оқибатида Isuzu ҳайдовчиси бошқарувни йўқотиб, машина Толариқ ариғига тушиб кетган.
Бу пайтда автобуснинг тезлиги 27 км/соатни ташкил этган. Воқеа сабабчиси бўлган Nexia ҳайдовчиси машинасида ҳодиса жойидан яширинган.
«Тошшаҳартрансхизмат»да хабар қилинишича, воқеа натижасида йўловчилардан ҳеч ким жабрланмаган, бироқ автобус ҳайдовчи — Абдурашид Қўзибоев (1981 й. т.) жароҳатланган. Унга бош мия чайқалиши ташхиси билан Республика неврология марказида амбулатор даволаш ёрдами кўрсатилди.
Ҳозирда Тошкент ИИББ ЙҲҲБ томонидан ушбу Nexia автомобили қидирилмоқда. Мазкур воқеага гувоҳ бўлганлардан «Тошшаҳартрансхизмат» ҳаракат хавфсизлиги бўлими ходимларига (+99899 848−69−99) ёки ИИББ ЙҲҲБга (230−94−52) хабар бериш сўралди.
