Ўзбекистон ва Қозоғистон янги автобус қатновини йўлга қўйди

Иллюстратив фото/Авто-Миллениум

Ўзбекистон ва Қозоғистон Тошкент - Қизилўрда - Тошкент йўналиши бўйича янги халқаро автобус рейсини йўлга қўйди, дея хабар беради «Ўзавтотранс» агентлиги.

Маълумотларга кўра, автобуслар «Ғишт кўприк» (Ўзбекистон) ва «Жибек Жоли» (Қозоғистон) назорат-ўтказиш пунктлари орқали чегарани кесиб ўтади.

Рейснинг якуний пунктларига «Тошкент» (Ўзбекистон) ва «Салтанат» (Қозоғистон) автобус вокзаллари айланади.

Таъкидланишича, йўналиш масофаси 583 километрни, сафар вақти - 10 соат-у 30 дақиқани ташкил этади.