Hyundai ҳар бир йўловчига ўзи ёқтирган мусиқани тинглаш имконини тақдим қилди

Hyundai автомобилсозлик компанияси автомобилнинг ҳар бир йўловчисига унга ёқадиган мусиқани тинглаш имконини берувчи аудиотизимни тақдим қилди. Бунда қулоқчин ёки шунга ўхшаш бирор қўшимча мосламани қўллашга ҳожат бўлмайди. 

Янги овоз тизими Separated Sound Zone SSZ деб номланиб, Hyundai’нинг таъкидлашича, бу тизим компаниянинг серияли автомобилларида яқин икки йил ичида пайдо бўлади. 

Тизимда ҳар бир йўловчи учун “шахсий аудиоҳудуд” яратилади. Автомобил салони бўйлаб ўрнатилган кўп сондаги динамиклар ҳар бир муайян йўловчига қаратилган назорат қилинувчи акустик майдонларни ҳосил қилади. Бундан ташқари, динамиклар бошқа йўловчилар учун товуш чиқараётган динамиклардан таралаётган товуш тўлқинларини фазавий силжитиш, экранлаш ва нейтраллаш функциясига эга. Бунда аудиоҳудуддан нафақат мусиқа тинглаш, балки телефонда гаплашиш учун фойдаланиш ҳам мумкин. 

“Бизнинг технология йўловчиларни уларга халақит берувчи, бироқ ҳайдовчига зарур бўлган овозлардан изоляция қила олади. Навигация тизими кўрсатмалари ёки огоҳлантирувчи хабарлар автомобилни бошқаришга эътиборни мужассамлаштиришга, SSZ технологияси эса бу овозларни бошқа йўловчилар товуш майдонига кирмасидан, ўз шахсий товуш майдонида сақлаш имкон беради”, деб айтилган компания хабарида.