Борис Жонсон: Британия ЕИ учун «бўш жой» бўлишга розилик билдирди

Буюк Британия собиқ ташқи ишлар вазири Борис Жонсоннинг маълум қилишича, мамлакат ҳукумати Brexit бўйича музокараларда тез орада таслим бўлади. Бу ҳақда The Telegraph хабар қилмоқда.

Унинг сўзларига кўра, Британия вазирлар маҳкамаси Европа иттифоқининг бўлажак норматив низомлари ва қоидаларига норозилик билдирмай, ЕИ учун «бўш жой» бўлиб қолишга розилик беради.

Шунингдек, унинг қўшимча қилишича, Brexit’дан сўнг Европа иттифоқи қонунчилиги лойиҳаларини ишлаб чиқишда Лондон овоз бериш ҳуқуқидан маҳрум бўлади.

Жонсоннинг қайд этишича, Британия бош вазири Тереза Мэйнинг Брюссель билан божхона иттифоқи бўйича таклифи Лондонни савдо келишувларига эришиш ҳамда савдо божлари билан ишлаш имкониятидан маҳрум қилади.