Ўзбекистон терма жамоаси ФИФАнинг 2019 йил январь ойи учун терма жамоалар рейтингида 89-ўриндан жой олди. Бу билан жамоа аввалги ўрнидан 6 поғона юқорилашга эришган.
Осиё жамоалари ичида Ўзбекистон 12-ўринда бормоқда, қитъа биринчилиги олдидан Эктор Купер бошқарувидаги жамоа 14-ўринда эди. Эрон термаси Осиё Кубоги ярим финалида курашни тўхтатган бўлса-да, қитъанинг биринчи рақамли жамоаси номини сақлаб қолган.
Сариқ қитъанинг янги чемпиони – Қатар терма жамоаси энг катта, 38 поғоналик сакрашни амалга ошириб, 93-ўриндан 55-ўринга кўтарилган. Бу – Қатарнинг 1993 йилдан кейинги энг яхши натижасидир.
Жаҳон рейтингининг юқори ўнлигида ўзгаришлар кузатилмади. Бельгия терма жамоаси ҳамон 211 терма орасида етакчи бўлиб турибди.
ФИФА навбатдаги рейтингни 4 апрель куни эълон қилади.
