Россия Федерациясида 149 та кичик банк банкротлик арафасида, деб ёзмоқда «Известия» молиявий бозордаги ўз манбасига асосланиб.
Омонатларни суғурталаш агентлигига ўтказилувчи ажратмалар миқдорининг оширилиши кўпчилик банклар учун жуда оғир синов бўлган. 2019 йилда кичик ва ўрта бизнес ҳисоб рақамларини ҳам суғурталаш зарурати туфайли харажатлар миқдори анча ошган.
Кўп миқдордаги ажратмалар муаммосини ечиш учун Россия банклар Ассоциациясида ишчи гуруҳ тузилган ва бу гуруҳ февраль ой якунига қадар Марказий банк раиси Эльвира Набиуллина иштирокида йиғилиш ўтказишни режалаштирмоқда.
2018 йилнинг июнь ойида Россия Марказий банки банклар барқарорлигини текшириш учун қатор стресс-тестлар ўтказган ва 117 та банк агар нефть нархи тушгудек бўлса, мураккаб вазиятга дуч келишини, бу, ўз навбатида, яна 107 банкда муаммолар туғдириши мумкинлигини билдирганди.
