Фуқаро авиацияси агентлиги директори тайинланди

Фото: KUN.UZ

Фуқаро авиацияси агентлиги директори тайинланди. Бу ҳақда Адлия вазирлиги телеграм канали хабар бермоқда.

Қайд этилишича, ҳукумат қарори билан Толиб Эгамбердиевич Улжаев Ўзбекистон Республикаси Транспорт вазирлиги ҳузуридаги Фуқаро авиацияси агентлигининг директори лавозимини эгаллаган.

Т. Улжаев шу вақтга қадар Ўзбекистон Республикаси Парвозлар хавфсизлигини назорат қилиш давлат инспекцияси бошлиғи лавозимида фаолият юритиб келган.

Жорий йилнинг февраль ойи бошларида транспорт соҳасида давлат бошқаруви тизимини тубдан такомиллаштириш чора-тадбирлари тўғрисида Ўзбекистон Республикаси президенти фармони эълон қилинди.

Унга кўра, Ўзбекистон Республикаси Парвозлар хавфсизлигини назорат қилиш давлат инспекцияси Ўзбекистон Республикаси Транспорт вазирлиги ҳузуридаги Фуқаро авиацияси агентлиги этиб қайта ташкил этилди.

Тайёрлаган: Отабек Матназаров

#авиация #Толиб Улжаев