Самарқанд вилояти Иштихон туманининг Қўрли қишлоғида яшовчи уй бекаси Зебинисо Рўзиқулова ҳовлисида кўкнори етиштирмоқчи бўлиб, гиёҳвандлик ўсимлиги уруғларини қадади. Албатта, кейинчалик суд йиғилишида бу ўсимликни экиб етиштириш тақиқланган эканлигидан хабардор бўлганини ҳам тан олган.
Лекин қўни-қўшнининг кўзи тушадиган жойда бемалол етиштириш, оқибатини ўйламаслик қонун-қоидаларга беписандликдир.
«Қорадори-2019» биринчи босқич тадбири давомида Самарқанд вилояти ва Иштихон тумани ИИБ ходимлари бу ҳовлига кириб борганда З.Рўзиқулова бемалол кўкнориларни суғораётган эди.
Аниқланишича, у ўз томорқасининг 5×2,5 м.кв жойида етиштираётган кўкнори ўсимликларининг ҳар бирининг бўйи 20-25 см бўлиб қолган. Улар ашёвий далил сифатида ҳужжатлаштирилиб олиб қўйилганлиги сабабли, у ўзига боғлиқ бўлмаган ҳолда кўп миқдордаги гиёҳвандлик воситасини ўтказиш жиноятини содир қила олмай қолди.
Жиноят ишлари бўйича Қўшработ туман судининг судья И.Ғуломов раислигида бўлиб ўтган очиқ суд мажлисида Зебинисо Рўзиқулова Жиноят кодексининг 270-моддаси 1-қисми билан энг кам ойлик иш ҳақининг 40 баравари миқдорида жарима жазоси, 25-, 273-моддасининг 5-қисми билан, 57-моддани қўллаб, 7 йил озодликдан маҳрум қилиш жазоси тайинланди.
Албатта, суд З.Рўзиқулованинг ҳеч жойда ишламаётгани, 5 нафар фарзанди борлиги, қилган жиноятида қаттиқ пушаймонлигини инобатга олиб, Жиноят кодексининг 72-моддасини қўллаб, тайинланган озодликдан маҳрум қилиш жазоси шартлига алмаштирилди ва уч йил синов муддати белгилаб берди.
