Темир йўлни кесиб ўтаётган 82 ёшли фуқарони поезд уриб кетди 

Наманган вилоятида темир йўлни кесиб ўтаётган фуқарони поезд уриб кетди. Бу ҳақда Ўзбекистон Республикаси ИИВ ҳузуридаги Тергов департаменти хабар бермоқда.

Бугун, 2019 йил 2 декабрь куни, соат 05:50ларда электровоз машинисти 28 ёшли А.Ш. бошқарувидаги 1230-сонли юк поездини Наманган вилояти Поп тумани ҳудудидан ўтувчи «Қўшминор-Поп» темир йўл оралиғининг 115-км. 1-пикетида ҳаракатлантириб кетаётган вақтида темир йўлни кесиб ўтаётган пиёда 82 ёшли Т.М.ни уриб юборганлиги натижасида Т.М. ҳодиса жойида вафот этган.

1230-сонли юк поезди соат 05:50да тўхтаб, соат 06:37да ўз йўналиши бўйича ҳаракатланиб кетган.

Ҳозирда ҳодиса содир бўлган жойда тергов-тезкор гуруҳи ишламоқда ва ҳодиса сабаблари ўрганилмоқда.

“Ҳурматли фуқаролар! Сиздан темир йўл яқинида ҳаракатланаётганингизда ёки йўлни кесиб ўтаётганингизда белгиланган йўл ҳаракати қоидаларига риоя қилишингизни сўраймиз”, - дейилади Тергов департаменти хабарида.