Коронавирус турли жисмлар юзасида 72 соатгача яшаши мумкин

Олимлар янги коронавирусни кўпчилик жисмларнинг юзасида 72 соатгача яшашини аниқлашди. Британиялик мутахассисларнинг бу ҳақдаги изланишлари натижасини The New England Journal of Medicine эълон қилди.

Фото: Reuters

Тадқиқотчилар пандемия келтириб чиқарган SARS-CoV-2 вируси билан унинг ўтмишдоши SARS-CoV-1 вирусини турли шароитларда қандай тарқалишини таққослаб кўришди.

Аниқланишича, ҳар иккала вирус деярли бир хил хусусиятга эга. Уларнинг пластик ва зангламас пўлат жисмлар юзасида яшаш қобилияти яхшироқ, мис ёки картон устида эса ёмонроқ.

Шунингдек, касаллик келтириб чиқарувчи вирус ҳавода уч соатгача сақланиб туради. Мутахассислар хулосасига кўра, бу унинг ҳаво-томчи йўли билан юқиш хусусияти борлигини тасдиқлайди.

Ўтган ҳафтада Бутунжаҳон соғлиқни сақлаш ташкилоти (БССТ) коронавирус инфекциясини пандемия - жуда катта ҳудудларга тарқалишга қодир кучли эпидемия деб эълон қилган эди.

Сўнгги маълумотларга қараганда, дунёда 200 мингдан ортиқ инсон коронавирусни юқтириб олган. Улардан 8 мингдан ортиғи вафот этган.

Тайёрлаган: Сардор Юсупов

#коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.