Пандемия сабабли 195 млн киши ишсиз қолиши мумкин - БМТ

Коронавирус пандемияси сабабли 2020 йилнинг 2-чорагидаёқ 195 млн киши ўз ишини йўқотиши мумкин. Бу ҳақда БМТнинг пандемиядан кейин давлатлар иқтисодиётини тиклаш бўйича чоралар “йўл харитаси”да айтилган.

Фото: Nick Oxford / Reuters

“Коронавирус инқирози жаҳон иқтисодиётини ишсизлик ва ночорликнинг тарихий даражаси билан рецессияга чўмдирмоқда”, деб таъкидлаб ўтишган БМТ мутахассислари.

Инқироздан кичик ва ўрта корхоналар, қишлоқ хўжалиги ишчилари, ўзини иш билан таъминлаганлар, қочқинлар ва меҳнат мигрантлари энг кўп жабр кўриши мумкин.

БМТда таъкидланишича, инқирознинг эркаклар ва аёлларга таъсири ҳам турлича бўлади. “Аввалроқ ҳам мавжуд бўлган гендер тенгсизлиги ҳисобига аёллар иқтисодиёт тикланиши вақтида янги иш қидиришда ёки тадбиркорлик имкониятларидан фойдаланишга уринишда қийинчиликларга дуч келишлари мумкин”, дейилган ҳужжатда.

Охирги маълумотларга кўра, дунёда коронавирусга чалинганлар сони 3 млндан ошди. Дунёнинг деярли барча давлатларида карантин чоралари киритилган. Бироқ чекловлар ортида кичик бизнес, хусусий тадбиркорлар касодга учрамоқда. Кўплаб ишчилар мажбурий таътилга жўнатилмоқда ёки бўшатилмоқда.

Тайёрлаган Шуҳрат Раҳимов

#БМТ #ишсизлик #пандемия

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.