Лицензиялаш тартиб-таомиллари тўғрисидаги қонун лойиҳаси эълон қилинди 

Норматив-ҳуқуқий ҳужжатлар лойиҳалари муҳокамаси порталида “Лицензиялаш, рухсат бериш ва хабардор этиш тартиб-таомиллари тўғрисида”ги қонун лойиҳаси эълон қилинди.

Қонуннинг амал қилиши қуйидаги фаолият турларига нисбатан татбиқ этилмайди:

интеллектуал мулк объектларидан фойдаланишда, шунингдек комплекс тадбиркорлик лицензияси шартномаси (франшизинг тўғрисидаги шартнома) бўйича юзага келадиган муносабатларга;

тадбиркорлик субъектларини, битимларни, ҳуқуқларни ва мол-мулкни давлат рўйхатидан ўтказиш ҳамда ҳисобга қўйиш;

аккредитация қилиш, сертификатлаштириш, стандартлаштириш, метрология ва техник жиҳатдан тартибга солиш;

давлат экологик экспертизаси;

давлат сирлари муомаласи.

Агар Ўзбекистон Республикасининг халқаро шартномасида Ўзбекистон Республикасининг фаолиятнинг айрим турларини лицензиялаш, тадбиркорлик фаолияти соҳасидаги рухсат бериш ва хабардор этиш тартиб-таомиллари тўғрисидаги қонун ҳужжатларида назарда тутилганидан бошқача қоидалар белгиланган бўлса, халқаро шартнома қоидалари қўлланилади.

Лицензиялашни, рухсат бериш ва хабардор этиш тартиб-таомилларини амалга оширишнинг асосий принциплари қуйидагилардир:

тадбиркорлик субъектларининг ҳуқуқлари ва қонуний манфаатлари, фуқароларнинг ҳаёти ва соғлиғи ҳимоя қилинишининг, жамоат хавфсизлигининг ҳамда атроф-муҳит муҳофаза қилинишининг таъминланиши;

лицензияни, рухсат бериш ёки хабардор этиш тартиб-таомилларини жорий этишнинг асослилиги ва самарадорлиги;

истеъмолчилар, тадбиркорлар ва давлат манфаатларининг мувозанати;

лицензиялаш, рухсат бериш ва хабардор этиш тартиб-таомилларининг ошкоралиги, очиқлиги ва қонунийлиги;

лицензиялаш ва рухсат этиш этиш хусусиятига эга ҳужжатларнинг “ягона дарча” орқали берилиши;

лицензиялаш ва рухсат этиш хусусиятига эга ҳужжатларни бериш тартибига доир талабларнинг ягоналиги;

даъвогар, лицензиат, рухсат берувчи ҳужжатни олган шахслар ёки хабардор этувчилар ҳуқуқларининг устуворлиги.