Мингдан кўпроқ хитойлик олим АҚШни тарк этди

Мингдан кўпроқ хитойлик олим Вашингтон Пекинни АҚШ технологияларини ўғирлашда айблагандан кейин АҚШни тарк этди. 

Бундай маълумотни АҚШ адлия вазирининг ёрдамчиси Жон Демерс Аспен институти томонидан ташкил этилган тадбирда маълум қилди. Унинг таъкидлашича, хитойлик олимлар адлия вазирлиги саноат ва технологик жосусликдаги айбловлар бўйича бир қатор жиноий ишларни қўзғатганидан кейин АҚШдан чиқиб кетган.

Адлия вазирлигидаги мансабдор шахслардан бирининг таъкидлашича, АҚШ хитойлик олимларни Хитой Халқ-озодлик армияси билан алоқаларда гумон қилмоқда. 

29 май куни АҚШ президенти Дональд Трамп Хитойдан АҚШ миллий манфаатларига хавф солиши мумкин бўлган аспирантлар ва олимлар киришини чекловчи фармойишни имзолаган. Таъкидланишича, гап Хитой армияси билан боғлиқ хитойликлар ҳақида борган. АҚШ ҳукумати фикрича, улар АҚШга технологиялар ва интеллектуал мулкни ўғирлаш мақсадида келиши мумкин. Хитой таълим вазирлиги АҚШнинг бу чекловларига нисбатан норозилик билдирган.