АҚШнинг 45-президенти Дональд Трамп президент лавозимидан кетгандан кейин илк бор ОАВда чиқиш қилди. У Fox News телеканали эфирида радиобошловчи Раш Лимбонинг вафоти муносабати билан таъзия билдирди.
Трамп билан суҳбат телефон орқали олиб борилган.
“Атрофимизда афсоналар унча кўп эмас, лекин у (Раш Лимбо) – афсона. У бу мамлакатни жуда яхши кўрарди. У бу мамлакатнинг одамларини жуда яхши кўрарди. Раш ўзига хос эди, унинг ўрнини ҳеч ким боса олмайди. Унда улкан аудитория бор эди”, деб айтган Трамп эфирда. Собиқ президент марҳум радиобошловчи билан 3-4 кун аввал гаплашганини айтиб ўтган.
Раш Лимбо 70 ёшида ўпка саратонидан вафот этди. У АҚШ тарихидаги энг обрўли медиашахслардан бири бўлган. Лимбо ўз дастурларида аҳолининг консерватив қарашларга эга қатлами манфаатларини қўллаб-қувватлаб келган. Трамп 2020 йилда Лимбони Президентнинг озодлик медали билан тақдирлаган. Телебошловчи 2021 йил январда Капитолийнинг ишғол қилинишида иштирок этганларни мустақиллик учун уруш қаҳрамонларига қиёслаган.